Fréttir

Miðvikudaginn 16. mars fór undankeppni Norðurlandsriðils Skólahreysti fram í íþróttahöllinni á Akureyri. Dagmar Ólína, Dalmar Snær, Hanna Rún og Jón Gylfi kepptu fyrir hönd Varmahlíðarskóla og öflugt stuðningslið úr 8.-10. bekk hvatti þau dyggilega. Skemmst er frá því að segja að Varmahlíðarskóli hreppti 3. sætið eftir harða keppni og verður það að teljast afar viðunandi árangur miðað við heilsufar keppenda dagana á undan. Í ljósi þessa árangus má fyllilega sjá að Varmahlíðarskóli er á góðri leið með að skapa sér nafn í þessari keppni og í framtíðinni mun markið ávallt vera sett á eitt af þremur efstu sætunum.

Forkeppni Stærðfræðikeppni 9. bekkinga 2016 var haldin í mars. Keppnin er samstarfsverkefni FNV og MTR við grunnskóla á Norðurlandi vestra, í Fjallabyggð og á Dalvík. Að þessu sinni tóku 109 nemendur þátt. 15 efstu nemendurnir taka þátt í úrslitakeppni sem fer fram 15 .apríl í Bóknámshúsi FNV á Sauðárkróki. Þrír nemendur Varmahlíðarskóla komust áfram í úrslit, það eru: Ari Óskar Víkingsson, Ellert Kárason og Friðrik Snær Björnsson. Óskum við þeim innilega til hamingju með árangurinn.

Nemendur í 7. bekk Varmahlíðarskóla tóku þátt í upplestararhátíð þann 10. mars s.l. Nemendur lásu texta og ljóð af eigin vali sem þau höfðu undirbúið og æft undir leiðsögn Sigrúnar Benediktsdóttur umsjónarkennara. Allir þátttakendur stóðu sig frábærlega.

Næstkomandi miðvikudag verður undankeppni í Skólahreysti haldin í Íþróttahöllinni á Akureyri kl. 13:00. Þá fara nemendur í 8. - 10. bekk norður til að styðja okkar fólk í keppninni. Að venju verður ferðin nýtt í skólaheimsóknir hjá nemendum 10. bekkjar, en þeir fara í kynningar til VMA og MA. Á meðan skella nemendur í 8. og 9. bekk sér í keilu. Eftir keppnina fara allir út að borða á veitingastaðinn Greifann. Á síðunni krakkaruv.is er hægt að finna myndbandskynningar af liðum, þar á meðal Varmahlíðarskóla.

Þriðjudaginn 15. mars verður samráðsdagur í skólanum. Nú ættu allir foreldrar og forráðamenn að hafa fengið póst frá umsjónarkennurum barna sinna um fundartíma, ef hann hentar ekki er gott að hafa samband sem fyrst til að fá honum breytt. Þriðjudaginn 15. mars verður samráðsdagur í skólanum, nú ættu allir foreldrar og forráðamenn að hafa fengið tölvupóst með fundartímum. Gert er ráð fyrir að nemendur mæti með foreldrum sínum þar sem þessi dagur er skóladagur í dagatali nemenda.

Í kvöld kl. 20:00 halda 10. bekkingar páskabingó í matsal skólans. Spjaldið kostar kr. 500 en athugið að enginn posi er á staðnum. Allur ágóði rennur í ferðasjóð nemenda.

Vart hefur farið fram hjá neinum að árshátíð yngri nemenda var haldin s.l. föstudag og tókst með ágætum. Myndir voru teknar á bæði generalprufu og árshátíðinni sjálfri.

Föstudaginn 4. mars kl. 15:00 sýnir 1.-6. bekkur Varmahlíðarskóla leikritið Hróa Hött í Miðgarði. Allir velkomnir!

Nóg hefur verið að gera hjá nemendum skólans í nýliðinni viku. Skíðaferðin s.l. fimmtudag tókst þrusuvel. Daginn áður höfðu nemendur í 6. bekk heimsótt leikskólann Birkilund og rifjuðu þar upp gamla takta með krökkunum þar. Nokkurt magn af myndum var tekið á báðum dögum sem hægt er að skoða í febrúarmyndaalbúminu.

Á morgun stendur til að fara í skíðaferð í Tindastól með 5., 6. og 9. bekk ef veður leyfir. Allir eiga að koma vel klæddir og í góðu skapi. Þegar nemendur koma í skólann fá þeir morgunmat og smyrja sér nesti. Þeir sem ekki eiga skíðaútbúnað fá hann lánaðann í fjallinu. Þeir sem ekki treysta sér á skíði eða bretti geta komið með eða fengið sleða eða slöngur til að renna sér á. Vinsamlegast takið töskurnar með í skólann ef hætta þyrfti við ferðina.