Fréttir

Í Varmahlíðarskóla starfa hin ýmsu teymi og þar á meðal Læsisteymi. Teymið hefur það að leiðarljósi að efla læsi og lestur innan skólans. Halda utan um lestrarátök, vera í góðu samstarfi við bókasafnið og vera leiðandi í að halda mikilvægi lestrar og læsis á lofti. Meðal verkefna sem Læsisteymið er með eru lestrargestir. Það er heldra fólk úr nærsamfélaginu sem hefur áhuga á að koma inn í skólann og hlusta á lestur eða lesa fyrir nemendur. Lestur og læsi eru mikilvæg í námi og daglegu lífi. Með lestri kynnast börn nýjum orðum og ólíkum sjónarhornum. Þegar þau ræða það sem þau lesa eða hlusta á fá þau tækifæri til að velta fyrir sér merkingu orða, tengja efnið við eigin reynslu og segja frá því með eigin orðum. Þannig efla þau orðaforða sinn og lesskilning, sem nýtist í öllum námsgreinum, hvort sem þau lesa stærðfræðidæmi, fylgja leiðbeiningum eða finna aðalatriðin í fræðitexta. Læsi eykur líka sjálfstæði í daglegu lífi, til dæmis þegar við þurfum að skilja skilaboð, bera saman upplýsingar og meta hvort við getum treyst því sem við lesum. Sameiginlegar lestrarstundir geta jafnframt verið ánægjulegar og kveikt góð samtöl. Þegar nemendur lesa fyrir heldri borgara fá þeir að æfa sig í að lesa upphátt fyrir áheyranda. Þegar gestirnir lesa fyrir nemendur geta allir tekið þátt í sögunni, spáð fyrir um framhaldið og rætt hvers vegna persónurnar bregðast við eins og þær gera. Í vikunni komu Gísli Rúnar Konráðsson, Sara Valdimarsdóttir og Gunnar Rögnvaldsson til okkar sem lestrargestir. Fleiri gestir koma á næstu vikum. Við viljum endilega biðja fólk sem hefur áhuga á að taka þátt í þessu verkefni að hafa samband við skólann. Frábært verkefni sem leiðir kynslóðir saman í lestri. Í læsisteyminu eru Birgitta Sveinsdóttir, Helga Sigurðardóttir, Sara Gísladóttir og Sigrún Gylfadóttir.

Í þessari viku komu lestrarvinir í heimsókn í Varmahlíðarskóla, erum við ævinlega þakklát fyrir þeirra innlegg og aðstoð. Einnig hafa verið að koma einstaklingar í viðtöl hjá Margmiðlunarvali sem er að safna upplýsingum um Varmahlíðarskóla - frá skóflustungu til dagsins í dag. Þetta verkefni verður betur kynnt síðar. Mánudaginn næsta er dagur íslenskrar tungu, þá er ýmislegt um að vera inn í bekkjunum. Einnig verður samvera í Setustofunni þar sem 1-7. b. verða með undirbúin atriði, Tónkór Tónlistarskólans syngur og í lokin verður sameiginleg söngstund. Klukkan 20 þetta sama kvöld verður dagskrá á Löngumýri þar sem nemendur 7.b. kynna dagskrá kvöldsins. Þriðjudag fer 10.b. í heimsókn til eldri borgara klúbbsins niður á Löngumýri Vetur konungur hefur sýnt sig og því gott að minna á að börnin séu vel útbúin. Hlý föt, utanyfirbuxur og jafnvel gallar hjá þeim yngri, húfur og vettlingar. Einnig væri mjög gott ef nemendur gætu verið með þurrt sokkapar í töskunni. Bestu kveðju til ykkar

Skagfirski kammerkórinn og 7.bekkur Varmahlíðarskóla bjóða til dagskrár mánudaginn 16. nóvember kl. 20 á Löngumýri. Ljóð Halldórs Laxness verða lesin og sungin og skáldið kynnt. Allir velkomnir.

Boðið var upp á draugalestur í hrekkjavökumánuðinum fyrir yngsta - og miðstig. Nemendur fengu að velja sér eina fígúru, draug, leðurblöku, grasker eða könguló fyrir hverja bók sem þau lásu í október og hengdu upp hjá draugakastalanum. Eins og sést á myndinni voru nemendur afar duglegir að lesa og kastalinn varð fullur af allskonar hræðilegum verum.

Yngsta stig skólans (1.–4. bekkur) fékk heldur betur skemmtilega og skapandi heimsókn á dögunum þegar brúðuleikhúsið Stúdíó Handbendi mætti á svæðið með spennandi brúðugerðarsmiðju sem var í tilefni af Skúnaskralli - Barnamenningarhátíð Norðurlands vestra.  Í smiðjunni fengu nemendur tækifæri til að kynnast töfrum brúðulistarinnar undir leiðsögn fagaðila. Þeir fengu ekki aðeins að sjá hvernig brúðurnar lifna við, heldur spreyttu sig líka á því að hanna og búa til sínar eigin persónur. Hugmyndaflugið fékk að njóta sín og úr varð mikið dýrðarinnar brúðusafn og mikil gleði í hópnum. Stúdíó Handbendi er margverðlaunað atvinnubrúðuleikhús sem staðsett er á Hvammstanga en ferðast um allt land (og út fyrir landsteinana) með sýningar og námskeið. Leikhúsið var stofnað árið 2016 af Gretu Clough og er þekkt fyrir vandaðar og ævintýralegar sýningar fyrir börn og fullorðna. Handbendi hlaut meðal annars hina virtu viðurkenningu Eyrarrósina árið 2021 fyrir framúrskarandi menningarstarfsemi á landsbyggðinni, auk þess sem þau standa árlega fyrir alþjóðlegri brúðuleikhúshátíð á Norðurlandi vestra (Hvammstangi International Puppetry Festival). Við þökkum Stúdíó Handbenda kærlega fyrir frábæra, lærdómsríka og skapandi heimsókn sem skilur eftir sig fullt af nýjum hugmyndum og skemmtilegum minningum hjá krökkunum.

Þann 8. nóvember ár hvert er baráttudagur gegn einelti. Dagurinn minnir okkur á mikilvægi þess að allir fái að tilheyra, njóti virðingar og finni til öryggis í skólanum sínum. Einelti getur birst með ýmsum hætti, meðal annars í særandi orðum, útilokun, stríðni, líkamlegu ofbeldi og neikvæðum samskiptum á netinu. Það er ekki alltaf sýnilegt og því skiptir máli að við séum vakandi fyrir líðan barnanna, hlustum og tökum frásagnir þeirra alvarlega. Við getum öll lagt okkar af mörkum til að skapa jákvætt skólaumhverfi. Að bjóða öðrum með í leik, taka vel á móti skólafélaga og sýna umhyggju getur skipt miklu máli. Nemendur eru hvattir til að leita til fullorðins sem þeir treysta ef þeim líður illa eða verða vitni að einelti. Að segja frá er að biðja um hjálp – fyrir sjálfan sig eða aðra. Ábyrgðin á að bregðast við liggur hjá fullorðnum. Gott samstarf heimila og skóla er mikilvægur þáttur í forvörnum gegn einelti. Við hvetjum foreldra og forsjáraðila til að ræða við börnin um vináttu, virðingu og samskipti, bæði í daglegu lífi og á netinu, og hafa samband við skólann ef áhyggjur vakna. Í tilefni dagsins fóru nemendur og starfsfólk út og mynduðu tvo hringi norðan við skólann og sungu saman þrjú vinalög; Gull og perlur, Vinátta og Ég er vinur þinn og tóku allir vel undir.

Nemendur í 1.bekk hafa síðastliðna daga verið að vinna með bókina Sjóræningjarnir í næsta húsi í Byrjendalæsi. Afrakstur þeirrar vinnu var brúðuleikhús sem nemendur settu upp í dag og buðu skólahóp leikskólans á sýninguna. Nemendur voru búnir að búa til sjóræningjabrúður og brúðuleikhúsið sjálft, með aðstoð kennara. Mjög skemmtileg sýning.

Enn ein þrusu-skemmtileg vika búin. Margt hefur verið brallað nú sem áður, þrátt fyrir heilmikil flensuhrinu í samfélaginu. Mánudag kom Handbendi á vegum Skúnaskrall með tröllabrúðugerð fyrir yngsta stig, þar var mikið fjör. Miðvikudag var vel heppnað ball fyrir miðstigsnemendur á Blönduósi, var okkar fólk til sóma þar. Fimmtudaginn voru félagsmál hjá unglingastigi. Lögreglan ætlaði að koma í heimsókn á öll stig, en það frestast þar til síðar. Föstudag buðu nemendur í fyrsta bekk á leiksýningu, þau voru búin að gera leikbrúður, hin besta skemmtun Í dag, föstudag er baráttudagur gegn einelti. Kennarar vinna jafnt og þétt með bekkjum yfir veturinn í verkefnum tengdum baráttu gegn einelti. Misjafnt er milli hópa hvernig sú vinna fer fram t.d á tímabilum, í lotum, í þemaverkefnum eða jafnt og þétt á bekkjarfundum. Þó svo að nú séum við ekki lengur Olweusarskóli, þá eru unnið heilmikið starf innanhúss og kennarar meðvitaðir um mikilvægi þessarar vinnu. Vinna hefur verið hafin við að uppfæra stefnu Varmahlíðarskóla í eineltismálum. Á heimasíðu skólans má finna stefnu Varmahlíðarskóla út frá Olweusi og mun það standa þar til ný stefna verður tilbúin og sett í loftið. Minnum á mikilvægi þess að vera almennileg/ur við náungann - við vitum ekkert í gegnum hvað hann eða hún eru að ganga. Allir þurfa á því að halda að þeim sé sýndur skilningur og tilvera þeirra sé staðfest. Hjartans kveðjur