Fréttir

Það er búið að vera mikið að gera hjá nemendum í 10. bekk þessa vikuna. Það hafa verið starfskynningar þar sem nemendur fóru í heimsóknir á vinnustaði og fengu tækifæri til að sjá starfsemi þar en það var til dæmis farið á lögreglustöð, Sýn Sport, bakarí, ísbúð og margt fleira. Fimmtudaginn 26. febrúar fóru nemendur í heimsókn til FNV og fengu þar kynningu um skólann, hittu nemendur og sáu leikritið Stella í orlofi sem nemendur FNV eru að sýna þessa dagana.

Nú í vikunni hafa nemendur í 9. bekk farið á þriggja daga hestanámskeið hjá Hestafræðideildarinnar á Hólum. Nokkurra ára hefð er orðin fyrir þessu samstarfi og hafa margir nemendur fengið tækifæri til að kynnast hestamennsku í fyrsta sinn. Nemendur fá bæði bóklega og verklega tilsögn og má búast við að flestir hafi eitthvað gagn af þessu og allir þó nokkuð gaman.

Nú er skólastarfið hafið aftur eftir vetrarfrí sem varð óvenjulangt fyrir nemendur vegna leka í skólanum. Næstu dagar og vikur verða áskorun fyrir okkur öll en í sameiningu munum við gera okkar besta svo að öllum líði sem best á meðan á framkvæmdum stendur. Framkvæmdir og endurbætur eru á fullu og berum við vonir til að þær taki sem stystan tíma, en það verða þó nokkrar vikur.

Dagur sjaldgæfra sjúkdóma og heilkenna er föstudagurinn 27. febrúar næstkomandi. Þann dag ætlum við að ,,glitra í Varmahlíðarskóla" í tengslum við dag einstakra barna. Félag einstakra barna hvetur öll fyrirtæki og starfstaði landsins til að sýna stuðning og samstöðu við þá sem lifa með sjaldgæfa sjúkdóma eða heilkenni með því að ,,glitra með okkur". Glitraðu með okkur með því að klæðast einhverju glitrandi eins og glimmeri og/eða pallíettum. Allt sem er litrikt og glitrandi er skemmtilegt og minnir okkur á að börn eru allskonar. Sjáumst ,,glitrandi" á föstudaginn.

Nú nálgast vetrarfrí. Síðasti dagur fyrir það er öskudagur. Fyrsti dagur eftir vetrarfrí er þriðjudagurinn 24.febrúar. Þann dag hefst skóli kl. 10 og verða skólabílar tveimur stundum síðar á ferðinni en venjulega. Skólalok þann dag verða á hefðbundnum tíma. Bókasafnið verður lokað í vetrarfríinu. Við óskum ykkur öllum notalegs vetrarfrís.

Nú er árshátíð eldri nemenda afstaðin og hefðbundin stundaskrá í algleymi. Frumsýning á Ógleymanlegu martröðinni var föstudaginn 16. janúar fyrir troðfullum Miðgarði. Vegna mikillar eftirspurnar var aukasýning 29. janúar og mættu um 150 manns á þá sýningu. Sjaldan hefur eins mikil vinna verið lögð í sýningu í skólanum eins og við Ógleymanlegu martröðina, enda verkið frumsamið af nemendum. Strax eftir árshátíð 2025 stungu þrír 9. bekkingar upp á því að fá að skrifa sitt eigið handrit fyrir næstu árshátíð. Það voru þær Ólöf Helga, Rakel Sonja og Sigurbjörg Inga. Það var auðsótt mál, en til þess að tryggja sem best að höfundarnir fengju sem mestan stuðning, var lögð inn umsókn hjá Menningarfélagi KS um að fá aðstoð sérfræðings í leikritagerð. Styrkurinn fékkst og leikhúsfrömuðurinn Helgi Grímur Hermannsson leiðsagði stelpunum fram að vori, en þá kom hann norður og hélt dags-vinnustofu með öllum nemendum í 10. bekk. Í þeirri vinnustofu voru hinir nemendur bekkjarins innviklaðir í handritið. Að hausti hélt vinnan í handritsskrifum áfram, m.a. með aðstoð Helga Gríms. Í nóvember var handritið tilbúið til útprentunar og þá þegar voru nemendur búnir að prófa að leika veigamestu senurnar og flestallir komnir með hlutverk. Í kjölfarið hófst hefðbundið æfingferli með tilheyrandi kennslufalli, söng og leik, búningafansi, dansi og drama. Á frumsýninguna 16. janúar - og einu auglýstu sýninguna - mættu um 380 manns og seinkaði sýningu um fimm mínútur meðan stöflum af stólum var dreift um salinn til að koma öllum fyrir. Margir lögðu lið sitt við að koma sýningunni á koppinn, en þegar hefur verið minnst á Helga Grím og stuðning Menningarfélags KS. Foreldrar og skyldmenni nemenda lánuðu sviðsmuni og allskyns dót, Leikfélag Sauðárkróks lánuðu ómetanlega búninga og nokkrir starfsmenn skólans og foreldrar gáfu sinn tíma í verkið. Söngtextana sömdu Gunnar á Löngumýri, Ólafur á Grófargili, Íris Olga og Ólöf Helga.

Markmið verkefnisins er að lyfta verkum barna og sýna þeim hvað getur orðið úr hugmyndum þeirra. Einnig að auka áhuga barna á sögugerð á fjölbreyttu formi og sýna börnum að hverju hugmyndir þeirra geta orðið. Á haustin geta börn í 3. - 7. bekk sent inn í flokkunum: Lag og texti, leikritahandrit, smásögur og stuttmyndahandrit. Dómnefnd fær afhendar innsendingarnar án persónurekjanlegra upplýsinga og velur í hverjum flokki verk sem eru unnin áfram af fagfólki í samstarfi við börnin. Í ár var smásaga eftir Árdísi Heklu Pétursdóttur í 3. bekk valin áfram ásamt 17 öðrum smásögum og óskum við henni innilega til hamingju með árangurinn. Hún fær tækifæri til að vinna áfram með söguna sína hjá ritstjórum og verður sagan svo gefin út, ásamt hinum sögunum, í bókinni Risastórar smásögur.

Nemendur 4.-5. bekkjar Varmahlíðarskóla fóru í vettvangsferð í Málmey SK1 á Sauðárkrók. Áhuginn var mikill og Davíð Þór Helgason, annar stýrimaður, fór með nemendum um skipið og sýndi þeim stýrishúsið, fiskvinnsluna og björgunarbúnað.

Þorrablót eru gömul hefð sem var vakin aftur til lífsins á 19. öld. Þá kemur fólk saman, borðar góðan mat, syngur og skemmtir sér til að stytta biðina eftir vorinu. Maturinn sem við borðum á þorrablótum er í raun geymsluaðferðir forfeðra okkar. Áður en ísskápar voru fundnir upp þurfti að geyma matinn í salti eða súr (mysu). Þorri er fjórði mánuður vetrar samkvæmt gamla norræna tímatalinu. Hann byrjar alltaf á föstudegi í 13. viku vetrar (á tímabilinu 19. til 25. janúar). Fyrsti dagur þorra er Bóndadagur. Í gamla daga var það siður bænda að bjóða þorra velkominn með því að fara út, klæddir í aðeins eina brókarskálm, og hoppa í kringum bæinn. Spurning hvort einhverjir nýti þennan gamla sið enn í dag. Í dag, 28. janúar, var haldið þorrablót hjá okkur. Þá komu allir saman í matsalinn, sungu fjögur lög saman og borðuðu svo góðan þorramat og var gaman að fylgjast með hversu duglegir nemendur voru að smakka þorramatinn. Einnig var gamaldags fatnaður hafður í hávegum í dag og mættu nemendur og starfsfólk í hinum ýmsu fötum sem tengjast gömlum tímum.

Nemendur í 5.-7.bekk unnu saman í útikennsluverkefni í gær. Verkefnið var að hanna og búa til skutlur. Nemendur unnu saman í hópum og var byrjað inni á því að búa til skutlurnar og gera þær tilbúnar fyrir flug. Síðan var farið út fyrir skólann og þar reyndu nemendur að láta skutlurnar fljúga sem lengst. Tímataka og lengdarmælingar voru hafðar til hliðsjónar til að finna út hver færi lengst. Notast var við spjaldtölvur við tímatöku og málbönd við lengdarmælingar, en þar reyndi þó nokkuð á reikningshæfni nemenda. Það þótti líka mjög jákvætt að skutlurnar færu snúning, en þar var hægt að ná sér í aukastig. Í lokin var boðið upp á dýrindis kakó og piparkökur sem nemendum þótti nú ekki amalegt að fá. Í þessu verkefni reyndi á samvinnu, hugmyndaflug, stærðfræði og hönnun.