Fréttir

Nýverið fór fram úthlutun styrkja frá Forriturum framtíðarinnar og hlaut Varmahlíðarskóli veglegan styrk. Tilgangur sjóðsins, Forritarar framtíðarinnar, er að efla tækni- og forritunarkennslu í grunn- og framhaldsskólum landsins. Sjóðnum bárust alls 32 umsóknir að þessu sinni, flestar frá grunnskólum. Styrkir sjóðsins eru í formi tölvubúnaðar og fjárstyrks til þjálfunar kennara til að búa þá betur undir forritunarkennslu fyrir nemendur.

Unglingar í 7.-10. bekk í Varmahlíðarskóla sýna söngleikinn Hársprey í Miðgarði, fimmtudaginn 11. janúar kl. 17:00 og föstudaginn 12. janúar kl. 20:00. Allir velkomnir og athugið, aðeins þessar tvær sýningar. Eftir sýningu fimmtudagsins er boðið upp á veislukaffi í Varmahlíðarskóla, eins og hefð hefur verið fyrir en að lokinni sýningu föstudagsins verður unglingaball fyrir 7.-10. bekk í Miðgarði þar sem meðlimir úr Hljómsveit kvöldsins sjá um að halda uppi fjörinu. Á föstudegi verður frístundastrætó, skráning í Nóra https://skagafjordur.felog.is/

Við sendum nemendum, fjölskyldum þeirra og íbúum í nærsamfélagi skólans bestu óskir um gleðilegt nýtt og farsæld á nýju ári. Þökkum fyrir ánægjuleg samskipti og samvinnu á liðnu ári. Krakkar við sjáumst hress og kát í skólanum miðvikudaginn 3. janúar skv. stundaskrá. Fyrstu daga janúarmánaðar setja unglingarnir kraft í árshátíðarundirbúning en söngleikurinn Hársprey verður sýndur 11. og 12. janúar.

Nú rétt í þessu lauk litlu-jólum skólans. Allar rútur er farnar heim með prúðbúna nemendur sem hlýddu á jólaguðspjallið og skólakórinn, dönsuðu í kringum jólatréð og héldu svo stofujól með bekkjarsystkinum sínum. Hátíðarmaturinn rann ljúflega ofan í nemendur og starfsfólk, en að vanda var hangikjöt með öllu tilheyrandi. Nokkrar myndir voru teknar í dag, sem sjást að neðan, ásamt öðrum myndum á aðventu.

Í dag verður aðventugleði og jólaföndur í Varmahlíðarskóla í umsjón foreldrafélagsins. Herlegheitin hefjast strax að loknum skóladegi kl. 14:55 og stendur til kl. 17:00. Nemendur i 9. bekk verða með vöfflur og kaffi/súkkulaði. Við hvetjum alla foreldra og nemenda að líta upp úr aðventustressinu og kíkja í Varmahlíðarskóla í samveru og föndur.

Í gær fóru nemendur 7. bekkjar og nokkrir starfsmenn í vettvangsferð til Silfrastaða. Þar tóku Johan og Hrefna á móti þeim og kynntu þau starfsemi sína. Þau hjónin eru skógræktarbændur og eru meðal annars að búa til girðingarstaura, eldivið, viðarplanka og jólatré. Var mjög fræðandi að læra um timburvinnsluna og hvað hægt er að vinna fjölbreytt úr trjám. Að lokum voru gestirnir leystir út með timbri og verður gaman að vinna úr efni úr heimabyggð. Johan og Hrefna eiga kærar þakki skyldar fyrir frábærar móttökur.

Í Fréttablaðinu í dag, 29. nóv., er umfjöllun um niðurstöður samræmdra prófa haustið 2017 þar sem fram kemur að einkunnir hafi verið jafnari milli kjördæma en áður. Þegar litið er til góðs árangurs á prófunum eru landshlutar og kjördæmi nefnd en þegar kemur að slökum árangri eru einstakir skólar nafngreindir og þar með talið okkar skóli, Varmahlíðarskóli í Skagafirði, sem er fámennur skóli með 109 nemendur. Þessi umfjöllun er ámælisverð og viljum við gera athugasemdir við fréttaflutninginn sem vart getur talist uppbyggjandi fyrir neinn.

Nú er komið að því, árshátíð 1.-6. bekkjar verður fimmtudaginn 30. nóv. kl. 16:30 í Menningarhúsinu Miðgarði. 1.-2. bekkur verður með íþróttaálfasprell og 3.-6. bekkur sýnir leikritið Í Ævintýralandinu, þar sem gömlu ævintyrin eru fléttuð saman á óvæntan hátt. Allir velkomnir, aðeins þessi eina sýning.