Fréttir

Skólasetning og fyrsti skóladagur Varmahlíðarskóla verður föstudaginn 23. ágúst kl. 9:00. Nemendur mæta í setustofu kl. 9:00 þar sem skóli verður settur og síðan tekur við skóladagur til kl. 12:00. Foreldrum er frjálst að fylgja sínum börnum ef þeir kjósa en skólabílar aka. Nemendum 1. bekkjar verður boðið til viðtals, ásamt foreldri/forsjáraðila, eftir hádegi á fimmtudag. Frístund, skóladagvistun barna í 1.-4. bekk, opnar frá og með mánudeginum 26. ágúst. Við minnum á skráningu í frístund.

Síðasta vor var tekin ákvörðun um að opna frístund eða heilsdagsvistun við Varmahlíðarskóla, fyrir nemendur 1.-4. bekkjar. Frístund opnar strax í skólabyrjun og verður starfrækt frá skólalokum til hálffimm á daginn og stendur börnum einnig til boða á starfs- og foreldraviðtalsdögum skólans.

Skólastarf skólaársins 2019-2020 hefst formlega með fræðsludegi skólanna í Skagafirði þann 15. ágúst kl. 9:00 í Miðgarði. Skólasetning og fyrsti skóladagur verður föstudaginn 23. ágúst.

Skólaslit Varmahlíðarskóla fara fram við hátíðlega athöfn í Miðgarði, miðvikudaginn 29. maí kl. 17:00.

Úrslit í Verksmiðjunni 2019 verða tilkynnt í Listasafni Reykjavíkur í dag. Þrír nemendur Varmahlíðarskóla eiga eitt þeirra tíu verkefna sem komust áfram í úrslit, en alls voru 30 hugmyndir sem kepptu í undanúrslitum.

Í gær ferðuðust nemendur 1. - 4. bekkjar heim að Hólum í Hjaltadal. Séra Gylfi tók á móti nemendum og sagði sögu staðarins. Eftir grandskoðun á kirkjunni og turninum var farið í sund og endað svo í grilli hjá gamla fjósinu á Hólum. Áður en heim var farið heimsóttu Varmhlíðingar nemendur í Grunnskólanum á hólum, farið var í útistofuna, drukkið þar nesti og náttúrulegt leiksvæði prófað til hins ítrasta.

Í síðustu viku frumsýndi Þjóðleiksval skólans leikritið Tjaldið eftir Hallgrím Helgason fyrir nokkuð vel þéttum sal í Héðinsminni. Verkið gerist á ónefndri útihátíð þar sem nauðgun hefur átt sér stað og eru mörg siðferðisálit tækluð í kjölfarið. Eftir sýningu taldi hópurinn best við hæfi að leggja aðgangseyrinn inn á reikning Stígamóta, grasrótarsamtaka sem berjast gegn kynferðisofbeldi.

Í gær, 7. maí, fóru nemendur í 1.-2.bekk og skólahópur leikskólans (Mánahópur) í gönguferð ásamt starfsfólki. Gengið var á Reykjarhólinn, með viðkomu á góðum áningarstöðum á leiðinni þar sem nesti var snætt og bryddað upp á leikjum Göngugarpar fengu æðislegt veður og skemmtu sér afar vel í ferðinni.

Í dag mætti leikhópurinn Lotta galvaskur með sýningu þar sem þrem sögum var steypt saman; Nýju fötin keisarans, Hans og Gréta og Hérinn og Skjaldbakan. Á leiksýninguna mættu 1. - 5. bekkur sem og skólahópur leikskólans. Talið er nokkuð víst að áhorfendur hafi skemmt sér afar vel.