Fréttir

Diskarnir með Árshátíð eldri bekkja, Footloose, eru til sölu hjá Möggu riddara fyrir kr. 1.500. Ágóði af sölunni rennur til ferðasjóðs 10. bekkjar en það voru nemendur sem unnu með upptökuna, þ.e. klipptu, brenndu diskana og hönnuðu hulstrið.

Í náttúrfræði í vetur tóku nemendur 10. bekkjar fyrir vímuefni. Hver hópur valdi sér eitthvert vímuefni til þess að kynna fyrir samnemum sínum. Verkefnið mátti vinna á ýmsan hátt, t.d. sem skjásýning og fyrirlestur en einnig sem stuttmynd. Hér er verkefni Lilju Haflínu og Rakelar Eirar um áfengi en það er afar fróðlegt og skemmtilegt, svo ekki sé nú meira sagt.

Í tiltekt inn á myndavél skólans fannst þessi mynd frá því fyrir áramót af nemendum í málmsmíðavali, nýbúnir að festa upp körfuboltaspjald sem Magnús á Brekku gaf skólanum.

Á mánudaginn hefjast sveitadagar en þeir felast í því að nemendur skólans eru í sveitinni heima við, eða hjá ættingjum og vinum, i fjóra daga. Þar munu þeir takast á við þau störf sem til falla, rétta hjálparhönd og vinna samhliða verkefni sem þeir skila í skólann að vikunni lokinni.

Fimmtudaginn 7. maí var haldin sameiginleg bekkjarskemmtun hjá 1. – 3. bekk. Krakkarnir komu með leikföng að heiman og léku sér saman, síðan var farin verslunarferð í Kaupfélagið okkar þar sem krakkarnir keyptu sér ís og nammi fyrir 500 kr. Margir þurftu að spá og spekulera heilmikið áður en krónunum var eytt og var ferðin því á margan hátt einnig mjög lærdómsrík.

Í síðustu viku komust þeir löks á skíði, 2., 3. og 9. bekkir en þetta var þriðja atrenna. Hér að neðan má finna myndir úr ferðinni, en bent er á að inni á myndasíðunni eru myndir frá síðustu þremur skólaárum og safnið orðið þó nokkurt.

Mánudaginn 4. maí fóru krakkarnir í skólahópi leikskólans Birkilundar og nemendur 1. – 3. bekkjar Varmahlíðarskóla í sameiginlega gönguferð. Gengið var niður að Hestavígshamrinum neðan við Víðimel.

Fyrir nokkru fór af stað vinna í öllum bekkjum - og meðal starfsfólks - með geðorðalistann góða sem Geðrækt gaf út fyrir nokkrum árum. Hver bekkur fékk úthlutað einu geðorði, eða setningu til að vinna með, og sýndu þeir svo afraksturinn í setustofunni nú nýverið.

Á morgun, þriðjudag sýnir leiklistaval Útskriftaferðina í allra síðasta sinn. Sýning verður kl. 12:30 í Menningarhúsinu Miðgarði og eru allir velkomnir. Aðgangur er ókeypis.