Fréttir

Fimmtudaginn 11. nóvember verður danssýning í íþróttahúsinu kl. 14 og jólabingó hjá 10. bekk strax á eftir í Varmahlíðarskóla. Það verður sjoppa á staðnum og spjaldið kostar 1.000 krónur. Enginn posi. Einnig verður bókamarkaður í anddyri Varmahlíðarskóla. 100 krónur bókin. Allir velkomnir!

Í nóvember fór fram Barnaþingið 2025 í Hörpu, nánar tiltekið 20. nóvember á Mannréttindadegi barna, – stór og mikilvægt ráðstefna þar sem börn alls staðar af landinu koma saman til að ræða málefni sem snerta þeirra daglega líf, réttindi og framtíð. Barnaþingið er vettvangur fyrir börn til að láta rödd sína heyrast, taka þátt í ákvarðanatöku og koma hugmyndum sínum á framfæri við fullorðna sem starfa að málefnum barna. Markmiðið er að efla lýðræðislega þátttöku barna og minna á að skoðanir þeirra skipta máli. Í ár tóku yfir hundrað börn þátt í fjölbreyttum vinnustofum, samræðum og skapandi verkefnum þar sem rætt var meðal annars um skólamál, tækni, heilsu, umhverfi og jafnrétti. Börnin fengu tækifæri til að hitta sérfræðinga, fulltrúa stjórnvalda og ráðherra. Við erum einstaklega stolt af því að einn nemandi úr okkar skóla var valinn til að taka þátt í Barnaþinginu en það var hún Rebekka Ýr Ingadóttir í 8. bekk. Hún stóð sig frábærlega, tók virkan þátt í umræðum og lagði sitt af mörkum með hugmyndum, spurningum og áherslum sem endurspegla reynslu og sjónarmið barna í dag. Það er mikill heiður að fá að taka þátt í Barnaþinginu og frábært tækifæri fyrir börn til að hafa áhrif á samfélagið. Við óskum okkar fulltrúa innilega til hamingju með þátttökuna.

Nú líður senn að jólum og fer skólastarfið að litast mikið af því. Í dag, 28.nóvember, kveiktum við á jólaljósum á jólatrénu við skólann. Var það góð stund, þrátt fyrir mikinn kulda. Á eftir var morgunmatur þar sem allir gæddu sér á dýrindis heitu súkkulaði og heitu brauði að hætti matráða.

Á haustdögum efndi Mjólkursamsalan (MS) til ljóðasamkeppni meðal nemenda 8.-10.bekkja grunnskóla landsins. Álitleg ljóð voru valin til prentunar á mjólkurfernum, eftir að jólamjólkurfernurnar fjara út. Nemendur Varmahlíðarskóla voru hvattir til þátttöku - og niðurstaða þess varð sú að Edda Björg Einarsdóttir frá Syðra-Skörðugili var valin ásamt 47 öðrum nemendum víðs vegar af landinu til að fá ljóð sitt birt á mjólkurfernu. Um 1200 nemendur sendu ljóð - svo árangur Eddu er eftirtektarverður. Óskum Eddu til hamingju með árangurinn og hlökkum til að berja ljóðið augum á fernu framtíðarinnar. Hér á eftir gefur að líta ljóðið:

Nemendur í 1. - 7. bekk tóku þátt í Svakalegu lestrarkeppninni í haust og lentu í 9.sæti sem er frábær árangur. Tæplega 17 þúsund börn í 1.-7. bekk í 90 skólum um land allt tóku þátt í Svakalegu lestrarkeppninni 2025. Var afhent viðurkenningarskjal til nemenda í síðustu viku. Innilega til hamingju!

Í dag ríkti sannkölluð hrekkjavökustemning í grunnskólanum þegar nemendur og starfsfólk mættu í fjölbreyttum og skemmtilegum búningum. Skólahúsið breyttist í litríkan og draugalegan stað þar sem nornir, vampírur, beinagrindur, ofurhetjur og alls kyns furðuverur gengu um ganga skólans. Búið var að eyða síðastliðnum dögum og vikum í skreytingar og undirbúning og var afrakstri þeirra vinnu gerð skil í dag.

Nemendur í 1.–7. bekk tóku þátt í Svakalegu lestrarkeppninni sem haldin var 15. október - 15. nóvember og árangurinn var algjörlega frábær! Saman lögðu nemendur sig fram við að lesa heima og í skólanum, og samanlagt lásu þeir alls 76.480 mínútur! Markmið keppninnar er að hvetja nemendur til að lesa daglega, njóta bóka og efla lestraráhuga á skemmtilegan hátt. Það var gaman að sjá hvað nemendur voru duglegir að velja fjölbreyttar bækur og sýna lestri áhuga. Við erum gríðarlega stolt af nemendum fyrir frábæra þátttöku, áhuga og elju. Það er greinilegt að lestur færir kraft, sköpun og gleði inn í skólann!

Hreyfing er öllum lífsnauðsynleg og hér á bæ taka nemendur og starfsfólk þátt í ýmsum hreyfistundum. Í upphafi skólaárs voru hinir árlegu hreyfidagar haldnir, Ólympíuhlaup ÍSÍ í lok september og nú í október var fyrsta mílan gengin, en þá eru nemendur og starfsfólk hvatt til að ganga eina mílu (1,6 km) á skólatíma.