Fréttir

Mánudaginn 18. maí héldu nemendur 1. - 3. bekkjar af stað í skólaferðalagið sitt. Að þessu sinni voru það 28 nemendur ásamt umsjónarkennurum og tveimur stuðningsfulltrúum sem ferðuðust saman. Nemendur mættu galvaskir í skólann þennan blíðviðris dag. Fyrst komu allir saman í skólastofunni, þar sem tekið var manntal og farið yfir dagskrá dagsins. Þá fengum við okkur staðgóðan morgunverð áður en haldið var af stað. Leið okkar lá til Sauðárkróks. Farið var frá Varmahlíð kl. 9:00. Fyrsti viðkomustaður var skólalóðin við Árskóla. Þar var nú heldur betur tekið vel á móti okkur. Kennarar og nemendur á yngsta stigi Árskóla höfðu undirbúið komu okkar. Við fengum leiðsögn um skólalóðina og börnin tóku okkar nemendur að sér í leik. Eftir um það bil hálftíma leik þökkuðum við fyrir okkur og gengum upp í Litla skóg. Þar sem veðrið var dásamlegt, léku börnin frjálst, fóru að vaða og léku með ýmis leikföng sem gripin voru með í ferðina. Í Litla skógi nýttum við okkur aðstöðuna og fengum nesti í aðstöðuhúsinu. Næst gengum í sundlaugina þar sem hægt var að njóta sólar og sælu í u.þ.b. klukkustund. Hádegismatinn fengum við á Kaffi Krók, en það var pizzuhlaðborð með öllu tilheyrandi, gosi, frönskum og sósu. Mikil gleði var með þessa góðu máltíð. Rútan beið okkar eftir hádegisverðinn. Á heimleiðinni var stoppað við aparóluna og leikvöllinn í Túnahverfinu og tekin góð leikstund þar. Við vorum komin heim í Varmahlíð þegar skóladegi lauk kl. 14:50. Voru börnin glöð og afar ánægð með ferðina.

Andri Fannar Einarsson, nemandi í 4. bekk Varmahlíðarskóla, lenti í 2. sæti í Hugmyndasamkeppni Evolytes fjölskyldan mín 2026.

Föstudaginn 22. maí síðastliðinn fóru nemendur 6. og 7. bekkjar í skólaferðalag. Byrjað var í Kakalaskála þar sem nemendur fengu tækifæri til að sjá listasýningu og hlusta í leiðinni á Sturlungasögu. Síðan var gengið niður að grjótlistaverki sem Sigurður Hansen í Kringlumýri lét gera um Haugsnesbardaga. Mjög áhugavert og viljum við þakka Maríu og Sigurði kærlega fyrir frábærar móttökur. Eftir þá heimsókn var ekið sem leið lá út Blönduhlíð, yfir Hegranesið og stoppað á Sauðárkróki. Þar fóru nemendur í smá sjoppuleiðangur í Bláfell, nutu góða veðursins í sundlauginni á Sauðárkróki og svo var endað á pítsuhlaðborði á Hótel Varmahlíð þar sem Unnur staðarhaldari framreiddi dásemdar pítsur handa þeim. Frábær dagur þar sem veðrið lék við hvern sinn fingur.

Keppendur úr Varmahlíðarskóla stóðu sig einstaklega vel í undanúrslitum Skólahreysti sem fór fram í gær á Akureyri og tryggðu sér glæsilegt 2. sæti með 48 stigum. Liðið sýndi mikinn styrk, úthald og samheldni í keppninni og var skólunum sínum til mikils sóma. Við erum afar stolt af keppendunum okkar og þeim árangri sem þau hafa náð. Innilegar hamingjuóskir til keppenda og þjálfara þeirra – frábært starf!

Í dag, miðvikudaginn 29. apríl, mun lið Varmahlíðarskóla keppa í Skólahreysti á Akureyri. Keppendur eru: Fjölnir Þeyr Marinósson og Erna María Guðmundsdóttir hraðabraut. Haraldur Hjalti L. Bjarnason og Sigurbjörg Inga Sigfúsdóttir hreystiþrautir. Friðrik Logi Haukstein og Edda Einarsdóttir varamenn. Keppnin er kl. 17 og er sýnd í beinni útsendingu á Rúv. Við hvetjum alla til að koma saman við skjáinn og hvetja okkar fólk. ÁFRAM VARMAHLÍÐARSKÓLI!!

Á vordögum er hefð fyrir því að nemendur í 7. bekk eigi notalega stund með eldri borgurum á Löngumýri. Það er alltaf jafn gaman að sjá yngri og eldri kynslóðir tengjast með þessum hætti en börnin lesa upp valin ljóð, spila, spjalla og fá að lokum dýrindis veislu í boði eldri borgara. Börnin stóðu sig með miklum sóma og var hrósað margoft fyrir upplesturinn.